逛廣州上下九步行街的感覺（廣州人還會不會逛上下九）

2023-04-27 05:30:21

講到廣州嘅步行街，

你會諗起邊一條？

係升級之後嘅「網紅」北京路，

抑或被日漸遺忘嘅上下九？

相信不少朋友仔，

都好耐冇去行上下九啦，

今期可樂君帶大家，

一齊探下呢位「舊朋友」！

上下九竟然係95後？

上下九，

位於人民中路與寶華路之間，

全稱為「上下九商業步行街」。

雖然早在6世紀20年代，

呢一帶已經係商業聚集區，

但我哋熟悉嘅上下九步行街，

喺1995年9月30日先正式開通！

（有冇人同一日生日呢？）

從95年開始計嘅話，

上下九其實都好後生，

年紀同大家咁上下，

有冇好surprise？

綿延千米的騎樓街！

上下九步行街嘅騎樓連綿千米，

呢D建築始建於清代，

設計上融合咗南歐建築特色、

中國北方滿洲式裝飾，

以及西關傳統建築風格，

適應南方炎熱多雨嘅氣候。

唔止有觀賞價值，

仲非常實用，

騎樓可以為大家遮陽擋雨，

方便商戶、顧客喺任何天氣下，

進行商業活動！

不過呢度始終係戶外，

如今大家行慣咗大商場嘆冷氣，

天口㷫嘅時候嚟上下九，

可能就冇咁爽啦！

學生時代的平價購物勝地！

細個嗰陣，

邊有咁多大型商場，

行街買嘢都係要捐窿捐罅！

東急、女人街......

嗰D蜿蜒曲折嘅走道，

兩旁細細間又多貨嘅鋪頭，

行到篤發覺冇路兜轉頭，

回首望去人頭湧湧。

當其時，

人與人之間真係好close，

前面靚女條馬尾，

永遠會劈中你塊面！

如果你曾經逼過上下九D商場仔，

所謂「地獄3號線」又算D咩？！

當然，

而家裝修比較新嘅商場，

地方都闊落咗好多，

不過嚟行街嘅人，

似乎就冇預期咁多。

可能個個都鍾意追求新歡，

例如話旁邊恩寧路嘅永慶坊。

面對此情此景，

恐怕上下九都要問一句，

「所以愛會消失對不對？」

不變的懷舊美食天堂！

雖然熟悉上下九嘅朋友仔，

覺得佢冇咩好行，

都係旅客鍾意去多D。

不過有時去食下嘢，

回味一下傳統風味都唔錯噶！

上下九一帶，

集中咗好多老字號，

比如廣州酒家、蓮香樓，

以及陶陶居！

仲有林林牛雜、南信雙皮奶等

各式街頭甜品小食！

轉個彎到寶華路，

老字號更加密集！

陳添記

魚皮愛好者必吃之選！

文記壹心雞

每逢佳節

門前必定排長龍買雞！

順記冰室

行街行到攰

食個雪糕hea一hea

寶華麵店

肚餓就淥碗麵食下啦！

長樂腊味

秋風起食腊味，

得閒DIY煲腊味飯都唔錯！

美美

炸春卷、釀辣椒......

經典味道你要試！

除此之外，

呢度仲有不少懷舊服裝店，

以及報紙攤，

可以感受老廣市井風情！

講到呢度，

有冇勾起你同上下九嘅回憶？

你會有興趣嚟行下嗎？